> ## Content Index
> Fetch the complete content index at: https://chhutthauth.in/llms.txt
> Use this file to discover other available public pages before exploring further.

# LÂM-CHIU NGIÂ-ÔNG TENG-LIO̍K BÛN-HÒA CHU-SÁN
- URL: https://chhutthauth.in/lam-chiu-ngia-ong-teng-liok-bun-hoa-chu-san/
- Published: 2026-08-31T06:01:36.000Z
- Updated: 2026-08-31T06:01:36.000Z
- Description: Pîn-tong 3 tōa ngiâ-ông lóng lia̍t-chò bû-hêng bûn-hòa chu-sán ah! Lâm-chiu chóng-sǹg mā thong-kòe koān-chèng-hú ê tông-ì.
- Author: TIATLÊNG
- Tags: SIN-BÛN, BÛN-HÒA, THOÂN-THÓNG, PÎN-TONG

Hō͘ lâng hō-chò "Pîn-tong 3 Tōa Ngiâ-ông" ê só͘-chāi, hun-pia̍t sī Tang-káng, Liû-khiû, kap Lâm-chiu. Chêng 2 ê só͘-chāi tī 2008, 2010 í-keng tit-tio̍h bûn-hòa chu-sán ê sin-hūn. Kin-á-ji̍t Tâi-lâm "[TIONG-HOA JI̍T-PÒ](https://www.cdns.com.tw/articles/1452489?ref=taitokchi.com)" pò kóng Lâm-chiu Ngiâ-ông mā hō͘ Pîn-tong-koān lia̍t-chò [bû-hêng bûn-chu](https://taitokchi.com/tok-news-2026-8-31/?ref=chhutthauth.in) chi it ah.

Khoe-chiu Tāi-thian-hú hōaⁿ ê "[Lâm-chiu Ngiâ-ông](https://taitokchi.com/2021-lam-chiu-ngia-ong/?ref=chhutthauth.in)" kap Tang-káng, Liû-khiû bô sio-siāng. Lâm-chiu bô óa-hái, tō ài khì chiâⁿ-hn̄g ê [Khiā-hong hái-kîⁿ](https://maps.app.goo.gl/m2TkJkjWXRZidwRc9?ref=chhutthauth.in) chhiáⁿ-ông, sàng-ông. Koh lâi Lâm-chiu ông-iâ ē tī àm-sî-á chhut-sûn, ū sî koh-ē chông ji̍p-khì lâng tau lia̍h-kúi. Hoat-tián kap kî-thaⁿ nn̄g-ê só͘-chāi bô-kâng ê hong-sio̍k.

[Tang-káng](https://taitokchi.com/2021-tang-kang-ngia-ong/?ref=chhutthauth.in) kap Liû-khiû hoān-sè sī in-ūi bûn-chu sin-hūn khah-chá the̍h-tio̍h, koh ka-siōng mûi-thé tōa-la̍t tàu sio-pò, ta̍k-pái kí-pān lóng ū chē-chē lâng chham-ka. Tian-tò Lâm-chiu in-ūi kau-thong bô lī-piān, koan-kong-kheh bô hiah-chē lâng, ē-tàng hō͘ bîn-chiòng khiā koh-khah thâu-chêng teh chhin ba̍k-chiu só͘-ū thoân-thóng kho-gî ê kòe-têng.