2026 KOK-KA BÔ CHÈNG-SIÔNG KOAN-KIÀN PÒ-KÒ
2026 ah, iáu koh-ū 43% ê Tâi-oân bîn-chiòng kám-kak Pe̍h-sek Khióng-pō͘ kan-taⁿ hoat-seng tī 228 sū-kiāⁿ chiân-āu hit kúi-kò-goe̍h nā-tiāⁿ.
Tùi 2024 khai-sí pān chit-hō "KOK-KA BÔ CHÈNG-SIÔNG KOAN-KIÀN PÒ-KÒ" ê Ko͘ Khoan-bín Ki-kim-hōe, cha-hng 13 hoat-piáu 2026 ê tiau-cha. Chit-pái kap Tong-ngô͘ Chèng-tī-hē ha̍p-chok, chhiáⁿ Chèng-tāi Soán-giân Tiong-sim chò bîn-tiāu. Ū kui-hāng sò͘-jī lán ta̍t-tit chò-hóe lâi khòaⁿ.
- 53.7% Oân-choân bô thiaⁿ-kòe 228 liáu ê "Chheng-hiong"
- 42.9% M̄-bat thiaⁿ-kòe N̂g Bûn-hiông kap 424 Chhèng-sat Chiúⁿ Keng-kok ê tāi-chì
- 39.6% M̄-chai-iáⁿ Sú Bêng kap "Tâi-oân-lâng 400 Nî Sú"
- 36.3% Bô thiaⁿ-kòe Tiong-le̍k Sū-kiāⁿ
- 34.4% M̄-chai sím-mi̍h sī O͘-miâ-toaⁿ
- 29.5% M̄-bat thiaⁿ-kòe Tân Bûn-sêng sū-kiāⁿ
Kin-nî ê pò-kò, hō͘ chhái-hóng ê 82.5% ū tāi-ha̍k ê ha̍k-le̍k, chia-ê lâng m̄-bat Tâi-oân bîn-chú-hòa ê le̍k-sú soah tian-tò khah liáu-kái khò-pún ū teh kà ê Cha̍p-tōa Kiàn-siat, thè-chhut Liân-ha̍p-kok, 823 Phàu-chiàn.
M̄-kú mā ū 7 siâⁿ ê lâng jīn-ûi liáu-kái kok-ka pō͘-le̍k kài tiōng-iàu, 6 siâⁿ kám-kak ài chhú-lí tòng-sán khah kong-pêⁿ. Ki-kim-hōe ǹg-bāng ha̍k-hāu kàu-io̍k tō-ài kā chu-goân pun hō͘ hó-sè, pau-khoat sin-seⁿ ê chai-pôe lóng sī ki-pún kang-têng chi it.
