GÂU CHHĪ SAT-BA̍K-Á Ê LÎM LIA̍T-TÔNG TŃG-KHÌ AH!
Chhōa-niá 80 nî-tāi Tâi-oân ēng ùn-á chhī sat-ba̍k, hō͘ chin-chē hî-bîn thàn-chia̍h ê choan-ka Lîm Lia̍t-tông, bān put-hēng kòe-óng ah.
Sat-ba̍k-á sī lán Tâi-oân chiok tiōng-iàu ê chia̍h-si̍t, mā sī kok cho̍k-kûn kap bûn-hòa ê tāi-piáu chi-it. M̄-kú chá-chêng lóng sī tī hái-piⁿ-á lia̍h, kàu Lîm Liân-tông sêng-kong tī Ka-tang ê ùn-á chhī 1.3 bān chiah ê hî-chai. Tâi-oân-lâng khai-sí ē-tàng tī ùn-á chhī tōa-liōng ê sat-ba̍k. 2006 Kok-sú-koán chhut-chheh kā i ê kò͘-sū siá lo̍h-lâi sî, kā i hō-chò "Sat-ba̍k-á ê Lāu-pē."
89 hòe ê Lîm Lia̍t-tông tī 9 goe̍h chhe 5 àm-sî teh sûn hî-ùn sî, bô sè-jī poa̍h lo̍h chúi. Hō͘ lâng hoat-kián sàng-khì Tang-káng An-thài Pīⁿ-īⁿ, mā-sī bô hoat-tō͘ kā kiù tńg-lâi. Chiâⁿ-chē hî-bîn tùi 80 nî-tāi kàu taⁿ, siū i ê pang-chān, thiaⁿ-tio̍h chit-hō siau-sit chiâⁿ m̄-kam, iû-kî sī Ka-tang ê chāi-tē-lâng chiâⁿ kám-siā i.
I m̄-nā gián-kiù sat-ba̍k, mā kè-sio̍k teh chhì pât-ê hî-chai, hoat-tián kap ha̍k-hāu ā-sī chèng-hú ê chúi-sán-só͘ bô-kâng ê lō͘, chèng-bêng bîn-kan hoat-tián ê khùi-la̍t. Hoān-sè lán chit-má ē-tàng hiah-ni̍h kán-tan chia̍h sat-ba̍k lóng sī in-ūi i chá-chêng ê phah-piàⁿ.
