HŌ͘ LÂNG PHÌ-SIÙᴺ Ê CHIA̍H-HUN-SÓ͘

Chòe-kūn m̄-nā sī chah ji̍t-thâu ê ke-khì sòaⁿ hō͘ bîn-chiòng giâu-gî khai hiah-chē chîⁿ ūi sím-mi̍h bô ài chèng chhiū-á? Koh-lâi tō-sī chia̍h-hun ê só͘-chāi mā-sī tī bāng-lō͘ téng hō͘ lâng phì-siùⁿ.

Tâi-pak-chhī hoān-sè sī beh soán-kí ah, teh sak chin-chē ba̍k-chiu khòaⁿ-ē-tio̍h ê chèng-chhek. Chit-hō khòaⁿ khí-lâi kun-pún bô-hāu ê chia̍h-hun-só͘, tī Tâi-pak Kong-koán. Kan-taⁿ ēng thih-thiāu-á ûi khí-lâi chi̍t-khu. M̄-nā khong-khì bô hoat-tō͘ keh-khui. Koh bô-lâng chin-chiàⁿ ē khì ēng.

M̄-nā Kong-koán, tī pat-ê só͘-chāi mā-ū lâng hoat-kián sio-siāng ê só͘-chāi. Gī-oân tō te̍k-pia̍t chiam-tùi Chiúⁿ Bān-an chhī-tiúⁿ teh sak ê "bô-hun siâⁿ-chhī" o͘-pe̍h kè-e̍k, koh kín-kín sak. Só͘-í chiah ē chhut-hiān chit-chióng mih-á. M̄-nā liáu-chîⁿ koh ē hō͘ lâng khí-chhiò.