KO-HIÔNG CHI̍T-KÒ-GOE̍H LO̍H CHI̍T-TANG Ê HŌ͘
Hó siau-sit: lán bián hoân-ló khiàm-chúi, pháiⁿ siau-sit: lán m̄-chai hō͘ ē lo̍h kah tang-sî. Chhī-bîn m̄-chai téng-pái chhut ji̍t-thâu sī tang-sî ê tāi-chì ah!
Kin-á-ji̍t sī 9 goe̍h chhe 1, m̄-kú Táⁿ-káu ê hō͘ iáu sī chho͘-kah. Kun-kú khì-siōng thóng-kè, 8 goe̍h ê Ko-hiông tō kā chi̍t tang ê liōng lo̍h hō͘ liáu ah. M̄-nā Ko-hiông, kui-ê ē-káng lóng teh chò tōa-chúi. Liân pêng-siông-sî beh tīⁿ ê Chan-bûn Chúi-khò͘ lóng té kah móa-móa. Hó siau-sit sī chi̍t-tang lóng bián hoân-ló khiàm-chúi, pháiⁿ siau-sit sī, lán iáu-kú m̄-chai tang-sî chiah ē chhut ji̍t-thâu.
"Téng-pái án-ni hoān-sè sī saⁿ-sì-cha̍p-tang chêng ah." Chāi-tē ê a-má án-ni kóng, chit-má ê siàu-liân-ke thâu-chi̍t-pái tú-tio̍h ē-káng lo̍h-hō͘ lo̍h kah bô soah ê. M̄-nā Chhâ-soaⁿ chhut-hiān chúi-chhiâng, lō͘ koh phoah-khang. Sì-kè im-chúi, pang-soaⁿ, thô͘-chio̍h-lâu. Thóng-kè 8 goe̍h Ko-hiông lo̍h 1,712 bí-lí.
Koh-khah hàm ê sī, hong-thai cháu liáu-āu koh beh khau tò-tńg-lâi. M̄-nā seng-lí-lâng pháiⁿ chò-sit, tú khai-ha̍k ê gín-ná khì ha̍k-hāu mā chiâⁿ gûi-hiám, koh bián kóng khiâ o͘-tó͘-bái siōng-pan ê chhī-bîn. Chiàu sin-bûn pò, Ko-hiông-lâng hoān-sè ài tán kah lé-pài 9 goe̍h chhe 6 í-āu, thiⁿ-khì chiah-ē khah ún-tēng.
