KUI-JÎN CHA̍P-SAᴺ-IÂU Ê BÛN-BU̍T TĪ TÁ-LO̍H?
Lâng-lâng tòa âng-hiā-á chhù ê Kui-jîn, hoān-sè sī in-ūi chia bat-ū kài-chē ê iâu teh chò kiàn-châi. M̄-kú lâng soah chiām-chiām-á bē-kì-tit ah.
Thiaⁿ-kóng 30 tang chêng chèng-hú bat chióng-lē bîn-chiòng khì Kui-jîn cha̍p-saⁿ-iâu ó͘ mi̍h-kiāⁿ, tōa-liōng ê le̍k-sú mi̍h-á lóng bô-khì ah! Chhun ê, hō͘ hū-kīn ê Jîn-siū-keng pó-chûn, ū ê khǹg tī biō piⁿ-á pó-chûn, ū ê kià hō͘ Kok-súkoán.
Cha̍p-saⁿ-iâu ê le̍k-sú ná-lâi-ná bô lâng teh thó-lūn. Ū lâng bat khì kā i gián-kiù, hoān-sè Chheng-kok sî-kî tō ū ah. Chit-má kong-só͘ pān oa̍h-tōng, siūⁿ-beh kā chāi-tē-lâng hiù tò-tńg-lâi. Chò-hóe siūⁿ pān-hoat kā chāi-tē ê te̍k-sek pó-chûn, hoat-tián. In phah-sǹg 10, 11 goe̍h beh chhut-pán chhiú-chheh hō͘ khah chē lâng chai.
Chheng-kok bóe-kî Ji̍t-pún-kok chhó͘-kî, Kui-jîn chia bē-chió chhù lóng khōng chng-á, sīm-chì Kui-jîn Kàu-hōe mā hō-chò "Âng-hiā-á Lé-pài-tn̂g." Ē-sái kóng sī khí-chhù châi-liāu kài sian-chìn ê só͘-chāi. Chit-má lâng chiām-chiām-á bē-kì-tit, ǹg-bāng bī-lâi ē-tàng ū ki-hōe kā chit-hō bûn-hòa koh chi̍t-pái hoat-tián khí-lâi.
