LÂM-CHIU NGIÂ-ÔNG TENG-LIO̍K BÛN-HÒA CHU-SÁN

Hō͘ lâng hō-chò "Pîn-tong 3 Tōa Ngiâ-ông" ê só͘-chāi, hun-pia̍t sī Tang-káng, Liû-khiû, kap Lâm-chiu. Chêng 2 ê só͘-chāi tī 2008, 2010 í-keng tit-tio̍h bûn-hòa chu-sán ê sin-hūn. Kin-á-ji̍t Tâi-lâm "TIONG-HOA JI̍T-PÒ" pò kóng Lâm-chiu Ngiâ-ông mā hō͘ Pîn-tong-koān lia̍t-chò bû-hêng bûn-chu chi it ah.

Khoe-chiu Tāi-thian-hú hōaⁿ ê "Lâm-chiu Ngiâ-ông" kap Tang-káng, Liû-khiû bô sio-siāng. Lâm-chiu bô óa-hái, tō ài khì chiâⁿ-hn̄g ê Khiā-hong hái-kîⁿ chhiáⁿ-ông, sàng-ông. Koh lâi Lâm-chiu ông-iâ ē tī àm-sî-á chhut-sûn, ū sî koh-ē chông ji̍p-khì lâng tau lia̍h-kúi. Hoat-tián kap kî-thaⁿ nn̄g-ê só͘-chāi bô-kâng ê hong-sio̍k.

Tang-káng kap Liû-khiû hoān-sè sī in-ūi bûn-chu sin-hūn khah-chá the̍h-tio̍h, koh ka-siōng mûi-thé tōa-la̍t tàu sio-pò, ta̍k-pái kí-pān lóng ū chē-chē lâng chham-ka. Tian-tò Lâm-chiu in-ūi kau-thong bô lī-piān, koan-kong-kheh bô hiah-chē lâng, ē-tàng hō͘ bîn-chiòng khiā koh-khah thâu-chêng teh chhin ba̍k-chiu só͘-ū thoân-thóng kho-gî ê kòe-têng.