LÁN Ê SIN-BÛN HONG-SIAⁿ TÙI CHIA PÀNG
CHHUT-THÂU-THIᴺ tùi 2026 8 goe̍h 15 khai-sí pháng, (chīn-liōng) ta̍k-kang chi̍t-phiⁿ sin-bûn, hō͘ tāi-ke ū só͘-chāi thang tha̍k.
Tāi-ke pêng-an. Chit-hō sin-bûn bāng-chām "CHHUT-THÂU-THIᴺ" tùi 5, 6 tang chêng iáu-bē tú-tio̍h Bú-hàn Hì-iām tō í-keng ū ê kè-e̍k. Chóng-sī, sî-kan chi̍t-ba̍k-nih kòe, chit-má sī hó ê sî-ki lâi pháng.
Kin-á-ji̍t 8 goe̍h 15, 81 tang chêng lán thiaⁿ hong-siaⁿ kóng chiàn-cheng káⁿ-ná kiat-sok ah. Sio̍k tī Tōa Ji̍t-pún Tè-kok ê lán, tī Jī-chiàn sî, hō͘ Bí-kok, Tiong-hoa-bîn-kok téng ê chà-tôaⁿ phah. Sòa-lo̍h-lâi sī Tiong-kok Kok-bîn-tóng chhōa Tiong-hoa-bîn-kok chèng-hú chiàm-niá Tâi-oân kàu taⁿ.
Éng-kòe, lán bat-ū ko͘ Lô-má-jī ê "TÂI-OÂN KÀU-HŌE KONG-PÒ," tùi 1885 Chheng-kok sî thòaⁿ kàu 1969. Kái-giâm liáu ê 1989 mā-ū "HONG-HIÒNG" phōaⁿ lán kiâⁿ. Thàu-kòe chit-hō jī, Pe̍h-ōe-jī lâi jīn-bat sî-sè, sin siau-sit. Hiān-chhú-sî, 2026 lán bô chi̍t-ê ún-tēng ê mûi-thé lâi pò hong-siaⁿ. Taⁿ lán tō kín-kín lâi chò chit-hāng tāi.
CHHUT-THÂU-THIᴺ àn-sǹg ta̍k-kang siá chi̍t-phiⁿ sin-bûn, chho͘-phoe chiàu kok mûi-thé ê siau-sit lâi e̍k-chò Tâi-oân-ōe koh ka lán pò ê koan-tiám. Bī-lâi mā hoan-gêng lia̍t-ūi tâu-kó, siat choan-nôa. Chiong lán ê bûn-jī kè-sio̍k se-thòaⁿ tī bāng-lō͘ téng. Hō͘ lán ū chi̍t-ê thang tha̍k Lô-má-jī sin-bûn ê só͘-chāi!
Chhiáⁿ ū teh tha̍k chit-hō CHHUT-THÂU-THIᴺ ê pêng-iú ah! Hoan-gêng tēng-phoe, ta̍k-kang ti̍t-chiap kā siau-sit sàng kàu lí ê tiān-náu phoe-tháng. Mā chhiáⁿ bián sè-jī lâi-phoe chí-kàu, thê-kióng ì-kiàn. Hō͘ chit-hō bāng-chām m̄-sī kan-taⁿ ko͘ chi̍t-ê lâng teh hōaⁿ nā-tiāⁿ. Sī chèng-lâng chò-hóe khí ê mûi-thé.
