TAKLUK "PA̍T-Á-TÔAᴺ SŪ-KIĀᴺ" TIT-TIO̍H PÊNG-HOÁN
1961 ū chi̍t-ūi kéng-chhat kap soan-kàu-su kiat oan-siû. Chhàng pa̍t-á-tôaⁿ tī in tau, hāi lóng-chóng 5 ê sìn-tô͘ siū lêng-tī.
Kin-á-ji̍t tī Takluk (Toh-lo̍k) Kàu-hōe kí-pān chi̍t-hāng oa̍h-tōng, beh siat-pi, pêng-hoán 1961 hit-tang tī chia hoat-seng ê "Pa̍t-á-tôaⁿ Sū-kiāⁿ." Tâi-oân Ki-tok Tiúⁿ-ló Kàu-hōe Chóng-hōe Le̍k-sú Úi-oân-hōe, kap Tiong-hoa-bîn-kok Hù-chóng-thóng Siau Bí-khîm, í-ki̍p Ciban Istanda (Ô͘ Bān-sêng) bo̍k-su lóng hù kàu-hōe chham-ka.
Chit-hō Pa̍t-á-tôaⁿ Sū-kiāⁿ, góa chiàu Hoa-liân "KENG-SENG JI̍T-PÒ" ê siau-sit kì tī ē-bīn. Nā chiàu Toh-lo̍k Kàu-hōe ê chu-liāu. Su-tong-sî chi̍t-ūi hō-chò Î Pó-tông ê kéng-chhat in-ūi kap kàu-hōe soan-tō Sím Kim-hok kiat oan-siû, tō kā pa̍t-á-tôaⁿ kap hoán-khòng ê bûn-kiāⁿ tè ji̍p-khì kàu-hōe ê kong-bûn phoe-lông. I chiū kā só͘-ū ê mi̍h-kiāⁿ chhàng tī Sím Kim-hok bîn-chhn̂g té.
Tāi-chì tō tōa-tiâu ah! I koh khan-thoa Tiuⁿ Kok-phín, Tiuⁿ Kok-heng, Tiân chhiū-tîn, Ko chek-thong chia-ê tiúⁿ-ló kap chip-sū, kā in tòng-chò chún-pī beh poān-loān ê chōe-jîn. Lóng-chóng 5 lâng hō͘ kéng-chhat lia̍h-khì Gio̍k-lí hun-kio̍k lêng-tī. Ēng chiam tu chéng-thâu-á, koàn kiâm-chúi, khah tah Sèng-keng. Chóng-sī in lóng bô-beh sêng-jīn in beh hoán-khòng. Koaiⁿ 8 kang liáu pêng-an tò-tńg-lâi.
Chá-sî-á tī Bunun (Bu-lun) Tiong-hōe, Takluk (Toh-lo̍k) Kàu-hōe mn̂g-khah-kháu, siat-li̍p kì-liām-pi. Kā tāi-chì ê keng-kòe kì tī chio̍h-á-téng. Hù-chóng-thóng mā thàu-kòe "hôe-hok bêng-gū" ê chèng-su kau hō͘ 5 ê siū-lān ê lâng kap in ê ka-cho̍k-á. Ǹg-bāng ē-tàng thàu-kòe án-ni pêng-hoán in éng-kòe ê khó͘-lān.
