TANG-CHIO̍H KĀ IO̍H-CHHIAM BÛN-HÒA THÒAᴺ-LO̍H-KHÌ
Io̍h-chhiam chiām-chiām-á lī-khui lán-lâng ê seng-oa̍h. M̄-kú Tang-chio̍h chiah m̄-nā Káng-kháu-keng, koh-ū io̍h-pâng chò-hóe tàu-saⁿ-kāng thoân-sêng.
Tī se-hng i-ha̍k iáu-bē ji̍p-lâi sî, éng-kòe ê bîn-chiòng ē khì biō-nih poa̍h-poe, liu io̍h-chhiam, chiah khì io̍h-pâng lia̍h io̍h-á. M̄-nā ē-tàng kā pīⁿ i hō͘ hó, mā in-ūi hō͘ sîn-bêng pó-pì thang hō͘ lâng ê sim pêng-an. Sī kài tiōng-iàu ê bûn-hòa thoân-thóng. Tng chit-hāng kó͘-chá-lâng ê tì-hūi chiām-chiām-á siau-sit, Tang-chio̍h Pūn-káng-kháu Káng-kháu-keng kap chāi-tē ê io̍h-pâng chò-hóe kā chit-hō thoân-thóng thòaⁿ-lo̍h-khì.
Káng-kháu-keng ê io̍h-chhiam-á, oân-chéng pó-liû chhiam-tháng, io̍h-tû-á, kap chhiam-chóa: Tōa-lâng 120 siú, gín-ná 60 siú, gán-kho 84 siú. M̄-kú m̄-sī kan-taⁿ óa-khò keng tō ē-tàng pó-chûn, koh-ài ū io̍h-pâng chiah-ū hoat-tō͘ lia̍h io̍h-á. Í-keng ū saⁿ-tāi le̍k-sú ê Siông-goân-tn̂g tō pó-chûn kó͘-chá chhau-pún, m̄-nā kap keng chò-hóe kàu-tùi chhiam-bûn, mā thê-kióng io̍h-châi hō͘ bîn-chiòng. Chit-má ta̍k kò goe̍h iáu-ū 10 gōa ê lâng ē choan-kang lâi the̍h io̍h-á.
Phoh-chú kong-só͘ ê pì-su choan-kang kàu Káng-kháu-keng kiû chhiam, thàu-kòe CHŪ-IÛ SÎ-PÒ ê hòng-sàng, kā chit-hō Hàn-i ê thoân-thóng ē-tàng hō͘ koh-khah chē lâng chai-iáⁿ. Hoān-sè í-āu mā ē-tàng chiâⁿ-chò Bû-hêng bûn-hòa chu-sán.
