CHOÂN-TÂI ÛI-IT Ê CHHIŪ-LÊNG-THAH

Chhit-goe̍h chhe 5 ah. Bîn-kan koàn-sio̍k ê Phó͘-tō͘ chòe-kūn ū bûn-hòa ho̍k-heng ê hiān-siōng. Chhiūⁿ kòa Phó͘-tō͘-teng, kap bat Tāi-sū-iâ sī sím-mi̍h. Lán Tâi-oân bē-chió só͘-chāi tû-liáu ū pài ti-á, ke-á chiah-ê tōng-bu̍t ê kì-liām-pi. Tī A-lí-san, ū choân Tâi-oân ûi-it ê "CHHIŪ-LÊNG-THAH."

Lán m̄-chai pài tōng-bu̍t ê pi tùi tang-sî khai-sí, m̄-kú ē-tàng tùi 1937 "TÂI-OÂN JI̍T-JI̍T SIN-PÒ" pò kóng choân-tó SIŪ-HÛN-PI liân-sòa siat-li̍p. Thong-siông chhāi sī thâi-ti thâi-ke ê só͘-chāi piⁿ-á. Kám-siā in sìⁿ-miā hiàn hō͘ jîn-lūi. Tī A-lí-san téng ê CHHIŪ-LÊNG-PI, mā-sī án-ni-siⁿ. Ūi-tio̍h kì-liām hō͘ chèng-hú chhò-tiāu ê 10 bān châng chhiū-á kap 77 ê tī chhò chhiū-á sí-khì ê Tâi-oân-lâng, Ji̍t-pún-lâng.

Ū lâng kóng hit-chūn Ji̍t-pún sî-tāi tī sòaⁿ-téng ê kang-lâng, chē-chē m̄-chai tit-tio̍h sím-mi̍h pīⁿ tō sí-khì. Koh-khah thoân-soat-tek ê sī liân chú-pn̄g, bí lóng chiâⁿ-chò âng-ê. Tāi-ke kiaⁿ-hiâⁿ, hoān-sè hō͘ Ji̍t-pún chèng-hú ap-le̍k, tī 1934 kí-pān CHHIŪ-LÊNG-CHÈ, keh-tńg-nî siat-li̍p hit-hō pi.

Tng lán tùi soaⁿ-nâ tit-tio̍h chu-goân, tō m̄-thang bē-kì-tit mā-ài kā hêng tò-tńg-khì. Chhiūⁿ chá-chêng "Chhò chi̍t-châng chhiū-á tō-ài chèng chi̍t-châng chhiū-á tńg-khì" ê cheng-sîn, chhiūⁿ Lìm Sên-siòng (Lîm Seng-siông) bat hoah-e "Kā ka-tī chèng tò-tńg-lâi" án-ni. Kap tōng-bu̍t, hoe-chháu chò-hóe seng-oa̍h. M̄-sī ēng chit-chióng bô tùi bī-lâi hū-chek ê chah ji̍t-thâu ê sòaⁿ ké-chò būn-tê tō kái-koat ah.