TÂI-BÍ-JÎN TŌ ÀI CHHUT-HIĀN TĪ SIN PHOK-BU̍T-KOÁN
Bí-kok tng beh khí A-chiu/Thài-pêng-iûⁿ Bí-kok-lâng Phok-bu̍t-koán. Tâi-bí-jîn ǹg-bāng lán ê siaⁿ-im kap le̍k-sú bē-sái bô chhut-hiān tī hia.
Tùi 2022 khai-sí tiû-pī ê "A-chiu Thài-pêng-iûⁿ Bí-kok-lâng Phok-bu̍t-koán" (The National Asian Pacific American Museum) tī 2026 khai-hòng bîn-chiòng thê-kióng ì-kiàn. HOAH-PHAH (FAPA) kap Choân Bí Tâi-oân-lâng Tông-hiong-hōe chò-hóe sak "Hun-hióng Goán ê Sim-siaⁿ" ê liân-sú, ǹg-bāng Tâi-bí-jîn ê le̍k-sú, phah-piàⁿ, kap kòng-hiàn tō ài chhut-hiān tī phok-bu̍t-koán lāi, mā ài khak-tēng ēng Tâi-oân ê miâ-hō lâi phiau-chù.
Káⁿ-ná Tâi-oân tó-lāi iáu-koh ū bē-chió lâng m̄-bat "Tâi-bí-jîn" sī sím-mi̍h khoán ê lâng. Sīm-chì mā iáu-ū kài-chē lâng ēng "ABC" lâi kiò chit-kûn jīn-tông sī "ABT" ê lâng. Bí-kok-lâng mā ū ngō͘-kái, chhiūⁿ Tiān-sī-kio̍k "Tú Lo̍h-chûn ê Chhài-chiáu-á" (Fresh Off the Boat) kā Tâi-oân-lâng ê chū-toān hip kah piàn Tiong-kok-lâng khì-bī khì.
Chit-hō liân-sú, sî-kan chhiân kah 8 goe̍h té, hoan-gêng tī Bí-kok ê Tâi-oân-lâng ē-tàng tàu hòng-sàng, sio-chio chò-hóe kā chit-ê hong-siaⁿ pò chhut-khì.
